Batyr

KazakhYuvelir Батырхан Шүкеновке арналған мұра-топтамасы. Батырхан Шүкенов атындағы қормен бірлесе отырып, артистің мұрасына тағзым ретінде жасалған. Топтаманың өзегі — музыканы пішінге сыйдырып, әдетте уақыттың бойында жүретін дыбысты, ырғақ пен тынысты материалға көшіріп сақтасақ деген талпыныс.

Батырхан Шүкенов

Музыкант, композитор әрі саксофон орындаушысы. Батырдың музыкасын жасы да, ұлты да әртүрлі адамдар тыңдайды, оның әуені тыныштық, шыншылдық және тамырына адалдық идеяларын жеткізеді. Батырдың әндері бүтін бір ұрпақтың жанын тербеген, қазір де қазақ музыкасын енді танып жүргендердің жүрек қылын шертетін ортақ мәдени кодқа айналған. Жұрт Батырды өз болмысы, ұстамды, нақты әрі терең интонациясы бар артист деп білетін. Топтаманың өзегі де сол бейнеге сүйенеді.

Саксофон

Дизайнның тірегі — Батырдың қолынан түспеген альт-саксофон аспабы. Топтама аспаптың түрлі деталі, ең алдымен пернесі төңірегінде құрылады. Пернелер зергерлік элемент ретінде көрініп, сол пернені басып, ұстап тұрып, жіберген сәттерден музыка туады деген идея пішіннің негізгі мотивіне айналады.

Дизайн

Топтама өзара байланысты элементтер жиынтығы ретінде құрылған. Негізгі формаларға алынып-салынатын, композицияны өзгертіп, әшекейді түрліше қылып құрастыруға мүмкіндік беретін детальдар қосылады да, музыкада бір тақырып түрлі әуенге айналатыны сияқты, бір әшекейді түрлендіріп тағуға мүмкіндік береді. Сонда әшекей қатып қалған нысан емес, құбылып, түрленіп тұратын пішін болады.